« Шаңырақтың шаттығы – сәби »

           ЕЛІМІЗДЕ ШАҢЫРАҚ КҮНІ АТАП ӨТІЛЕДІ...

Бүгін, 17 наурыз Наурызнаманың төртінші – "Шаңырақ күні". Бұл күн елімізде жас ұрпақты тәрбиелеу мәдениетін көрсете отырып, олардың бойында патриотизм, адамгершілік пен еңбекқорлыққа деген құштарлықты қалыптастыруға үндейді. 

Қазақ өркениетінде "Шаңырақ" сөзі киелі мазмұнға ие. Бүкіл ұлт тұтас ірге жайған қара шаңырақ – ұрпақтар өрбіген қуатты ұя саналады. Жалпы, Наурыз мерекесінің жаңа тұжырымдамасы аясындағы «Шаңырақ» күні жалпыұлттық отбасылық құндылықтар мен кіршіксіз махаббат күніне айналады деуге негіз бар.

Халқымыздың осындай тамыры тереңнен бойлаған, тарихымен бірге жасасып келе жатқан рухани байлықтарының бірі – отбасы құндылықтары. Бақытты отбасында өскен әр бала – болашақтың негізін қалар қалқан.Отан отбасынан басталады. Осы қарапайым қағидат қай дәуірде болсын өзгерген емес. Өзгермейді де. 

Осы күні, орталық аудандық ауруханасының  перзентхана бөлімінде, жас аналар А.Назарбаева,Г.Сыдыкова сүйкімді сәбилер ұл мен қызды дүниеге әкелді.

Бес күндік ғұмырда бар бақытымыз да, қызығымыз да, күйбең тіршіліктің көлеңкелі сәттерін ұмыттыратын да балаларымыз екені даусыз. Қазақ байлығын қорасындағы малымен емес, бауырындағы баласымен өлшейтіні де содан болар. Бала көбейсе, бұл бір отбасының құт-берекесі ғана емес, күллі елдің байлығы, ұлт демографиясына дем берер жемісі.

Осыны ескерген аудандық әкімшілік « Шағырақ күні » мерекесіне орай сәбилі болған аяулы аналарды құттықтауды да назардан тыс қалдырмай, перзентханаға барып құттықтап, сыйлықтарын табыстады. Сәбиін бауырына аман-есен басқан жас аналар ақ халаттылар мен аудан әкімдігіне  алғыстарын білдірді.

Мереке қарсаңында дүние есігін ашқан сәбилер туған жеріміздің мақтанышына айналар тұлға болсын,ұзақ ғұмыр, мықты денсаулық, отбасыларыңызға бақ-береке тілейміз.